Grabitën banesën në Kamenicë gjatë fejesës, arrestohet një i dyshuari teksa po vidhte sërish

Është vënë në pranga njëri prej të dyshuarve të grabitjes së shënuar pak pas mesnatës së djeshme në fshatin Kamenicë të Korçës, teksa familjarët ishin duke festuar fejesën e njërit prej djemve.

Policia e Korçës ka kryer arrestimin e shtetasit Enkeled Kajo, i cili akuzohet si një prej të dyshuarve të kësaj vjedhje ku u arritën të merreshin plot 10 milionë lekë nga kasaforta.

Ai u arrestua në flagrancë teksa ishte duke grabitur një tjetër banesë. Emri i Enkeled Kajos nuk është i panjohur për policinë për shkak të precedentëve penalë të mëparshëm për vjedhje.

Detaje të Policisë së Korçës: 

Policia arreston njërin prej autorëve të dyshuar të vjedhjes me dhunë të ndodhur më datë 27.03.2017, në fshatin Kamenicë. Ky shtetas  u kap në flagrancë, në  tentativë për  të kryer vjedhjen e një banese tjetër po në këtë fshat.

Specialistët e Seksionit për Krimet, në Komisariatin e Policisë Korçë, bënë kapjen dhe arrestimin në flagrancë të shtetasit :

Enkeledi Kajo, 30 vjeç, lindur në fshatin Nikolicë-Korçë, banues në Durrës (i dënuar më parë për vjedhje).

Arrestimi i tij u bë pasi më datë 27.03.2017, në fshatin Kamenicë – Korçë, ky shtetas u kap në tentativë për të vjedhur në banesën e shtetases E.M, 43 vjeçe.

Gjithashtu nga shërbimet e Policisë, po vijon puna për dokumentimin e plotë me prova ligjore, të vjedhjes me dhunë të banesës së shtetasit N.B, 53 vjeç, ngjarje e ndodhur më datë 27.03.2017 në fshatin Kamenicë.

Pasi nga hetimet e kryera, shtetasi i lartpërmendur dyshohet të jetë njëri prej autorëve të mundshëm të saj. Po punohet për identifikimin dhe kapjen e bashkëpunëtorit tjetër të implikuar në këtë ngjarje.

Materialet  për hetime të mëtejshme i kaluan Prokurorisë të Rrethit Gjyqësor Korçë.

(XH.A/SHUPLAKA)