Ilir Leli, autori i grabitjes të shënuar pesë ditë më parë në një kazino tek “Zogu i ZI”, ka shfaqur pendesë përpara trupit gjykues. Në seancën e zhvilluar për të, ai ka pranuar autorësinë e grabitjes dhe ka rrëfyer se krimin e kreu për t’u hakmarrë ndaj lojërave të fatit.
“Atë ditë sapo kisha humbur 100 mijë lekë duke luajtur në kazino, nuk doja të vrisja asnjë, doja vetëm të merrja paratë që kisha humbur e për këtë krim jam i penduar”, është shprehur ai. Me këtë dëshmi, 47-vjeçari ka pranuar dhe armëmbajtjen pa leje, krim për të cilin rrezikon 10 vite burg.
Ndaj tij mësohet se po kryhen hetime dhe për përfshirjen në grabitjen e kazionos tek “Rruga e Elbasanit” dy ditë para arrestimit të tij, por vetë ai ka mohuar para hetuesve të ketë lidhje me këtë ngjarje.
Ilir Leli u arrestua në flagrancë mbrëmjen e 30 dhjetorit 2016, teksa ishte nisur për të grabitur një tjetër kazino pas grabitjes të kazinosë së parë tek “Zogu i Zi”.
Ai u kap mat nga policia teksa mbante në duar një pistoletë tip “TT”. Burime të policisë bënë me dije se 47-vjeçari kishte grabitur rreth 80 mijë lekë të reja. (XH.A/SHUPLAKA)
