Grabitja e bankës në ish-Bllok, pushohen hetimet për djalin e “Të fortit” të Linzës

Prokuroria e Tiranës ka vendosur të pushojë hetimet për Robert Kullën, djalin e Nehat Kullës, i cili dyshohet për grabitjen e 19 milionë lekëve në një bankë në ish-Bllok në 2016-ën. Burime të prokurorisë janë shprehur se nuk ka prova dhe fakte të mjaftueshme për implikimin e tij.

Prokuroria ka bërë me dije se Roland Liti (Zekaj) dhe Alan Babamato janë marrë si të pandehur, pasi akuzohen për vjedhjen e bankës në bashkëpunim. Ata hynë në bankë përmes gërmimit në garazhin e një objekti ngjitur, por u tradhëtuan nga gjurmët e gishtave lënë në një shishe uji.

Robert Kulla, i dyshuari ndaj të cilit kanë pushuar hetimet, ka qenë më parë i dënuar për “rrëmbim dhe mbajtje peng personi” dhe për “armëmbajtje pa leje”. Ai është djali i Nehat Kullës, njohur ndryshe si “I forti” i Linzës, i cili krijoi një bandë gjatë viteve 1997-1998, e cila kreu mjaft vrasje dhe krime të tjera.

(XH.A/SHUPLAKA)