Një grabitje është shënuar në fshatin Bulgarec të qytetit të Korçës, ditën e sotme pas mesnate. Mësohet se rreth orës 01:35 të së hënës, është grabitur me armë kasaforta e biznesit të shtetasit Luan Larti, që njihet si një prej biznesmenëve më me pozitë në qytet.
“Shuplaka” mëson se dy grabitësit e maskuar dhe të armatosur kanë vjedhur rreth 7 milionë lekë të vjetra dhe disa dokumente të biznesmenit që kanë gjetur brenda dyqanit ku tregtoheshin materiale ndërtimi.
Mësohet se grabitja ndodhi pak orë pas një ngjarje të rëndë për familjen e biznesmenit. Babai i Luan Lartit ndërroi jetë një ditë më parë, disa orë përpara se të kryhej grabitja.
Policia ka shkuar në vendngjarje dhe ka nisur hetimin për zbardhjen e plotë të saj.
Njoftimi i Policisë Korçë
Informacion paraprak : Më datë 19.12.2016, rreth orës 01.35, jemi njoftuar se në fshatin Bulgarec, në biznesin privat (prodhime materialesh ndërtimi) të shtetasit L.L, kanë hyrë dy persona të maskuar dhe të armatosur, të cilët dyshohet se kanë vjedhur një sasi parash brenda kasafortës së biznesit dhe më pas janë larguar. Grupi hetimor po punon për sqarimin e rrethanave të ngjarjes dhe dokumentimin e plotë të saj.
(XH.A/SHUPLAKA)
[ngg_images source=”galleries” container_ids=”179″ exclusions=”158,159,160,163,164,165,166,331,333,335″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
