70-vjeçari Qemal Shabani dhe gruaja e tij u grabitën mbrëmjen e së premtës kur katër persona të maskuar dhe të veshur me uniforma të policisë mësynë në banesën e tyre. Grabitësit qëlluan dhe dhunuan 70-vjeçarin në kokë me tytën e armës.
Nën kërcënimin e armës ata i grabitën kasafortën në të cilën ndodheshin rreth 5 milionë lekë (në euro dhe lekë), disa bizhuteri, si dhe dokumente të familjes. Ngjarja ndodhi rreth orës 21:30 të së premtes në fshatin Mollas të Cërrikut. Sipas policisë deri më tani për këtë ngjarje janë shoqëruar 15 person. Të shoqëruarit janë kryesisht banorë të zonës dhe persona me precedentë të mëparshëm në fushën e vjedhjes, shkruan një portal online.
70-vjeçari rrëfen tmerrin që kaloi:
Intevista:
Shabani, si ndodhi ngjarja?
Ishte ora rreth 21:30, kur fika televizorin dhe rashë të flija. Fikëm dhe dritat dhe bashkë me bashkëshorten ramë të flemë. Vetëm 10 minuta më pas, pashë pranë vetes sime një person, i cili me tytën e armës më goditi në kokë. Gjithashtu, pashë edhe gruan time e cila ishte shtrirë përtokë, dhe nuk mund të bënte asgjë, pasi ata ia kishin marrë edhe celularin.
Po si mundën të hynin ata në banesën tuaj?
Ishin katër persona të veshur si policë. Kanë hyrë nga karburanti. Pasi kanë thyer derën e dhomës së karburantit nga prapa, kanë nisur t’i bien derës së shtëpisë sonë që korrespondon me dhomën e karburantit. Gruaja i ka pyetur kush është, dhe ata i kanë thënë “hape se jemi Policia”. Në këtë kohë bashkëshortja ime ka hapur derën dhe njëri nga ata e ka goditur dhe e ka shtrirë përtokë. Më pas ata erdhën tek unë.
Të thanë se ishit të policisë?
Nuk munda të dëgjoja dot asnjë fjalë, vetëm më thanë “mos lëviz”, dhe njëri më goditi në kokë me tytën e armës. Unë tentova të ngrihesha, por ai më goditi përsëri. Mendova se ata më kishin marrë armën, sepse unë e kam një armë me leje, dhe isha i hutuar. Pasi më goditën mua, njëri më rrinte sipër kokës dhe tre të tjerët hynë në dhomën e gjumit dhe prej andej më morën të gjithë kasafortën.
Sa lekë kishit në kasafortë?
Brenda në kasafortë unë kisha 1550 euro, si edhe 3 milionë lekë të vjetër. Gjithashtu brenda në kasafortë kisha edhe dokumentet e shtëpisë së vajzës, të miat, ato të bankës, si edhe disa bizhuteri.
A keni ndonjë person që ju dyshoni se ka pasur dijeni për kasafortën dhe paratë e sendet që ndodhin në të?
Nuk kam bërë kurrë debate me njeri, as nuk kam debatuar kurrë me ndokënd, nuk e di se kush mund ta ketë bërë këtë. Pasi ato hynë brenda në dhomë të gjumit, as rojën e karburantit nuk e kishin vjedhur, vetëm e kishin kërcënuar me armë. (J.V/Shuplaka)
