Gazetari investigativ Artan Hoxha, zbulon detaje të reja mbi një nga të akuzuarit për grabitjen 3.2 milionë dollarëve në Rinas. Bëhet fjalë për të shpallurin në kërkim Admir Muratajn, i cili njihet edhe si “truri” i bandës.
I ftuar në rubrikën “Opinion”, Hoxha shprehet se Admir Murataj nuk është emri i vërtetë i të dyshuarit, por vetëm një prej 13 identiteteve që ai përdor.
“Admir Nikaj është emri i tij vërtetë. Ai njihet me 13 identetite të tjera dhe një prej tyre është Admir Murataj. Nikaj është me origjinë nga Tropoja dhe familja e tij ka ardhur në Fushë-Prezë. Admir Nikaj njihej më herët nga policia, pavarësisht se aktiviteti i tij nuk ka qenë në Shqipëri, por jashtë vendit. Ka qenë i arrestuar në Greqi dhe i arratisur nga burgu i Trikallës, të dhëna që tashmë janë bërë të ditura për publikun. Por një tjetër detaj lidhur me të është se ka qenë pjesë e grupit të Marjan Kolës, pjesë e të cilit është edhe Ilir Kupa i mbijetuar i atij grupi. Duket një grup që nuk ka emër në Shqipëri, por mund të thuhet se aktivitetin e ka patur mjaft intesiv jashtë.”, tha Hoxha.
Murataj ose Nukaj, është i arratisur nga burgu i Trikallës në mars të 2013-ës, bashkë me grupin e Ilir Kupës. Ky i fundit është kushëriri i shokut tjetër të grupit, Ernest Kupës, i cili aktualisht ndodhet prapa hekurave. Ilir dhe Ernest Kupa, janë të përfshirë gjithashtu në “Bandën e Babagjyshëve”, të cilët në prag të Krishlindjeve të 2013-ës, vodhën një dyqan në një qendër tregtare në periferi të Tiranës. (D.D/Shuplaka)
Discussion about this post