Grabitja me armë ndodhur sot në aeroportin e Rinasit ka përfunduar me 1 të vdekur.
Viktimë sipas policisë ka mbetur njëri nga grabitësit i cili është vrarë gjatë shkëmbimit të zjarrit mes forcave të forcave FNSH dhe RENEA të cilat u vunë në ndjekje të 4 autorëve të grabitjes.
Grabitja me armë ka ndodhur pasditen e sotme në Rinas, ndërsa burimet policore bëjnë të ditur për Faxweb se ka 1 të vdekur nga përplasja mes palëve.
Persona të veshur me rroba ushtarake kanë hyrë brenda aeroportit “Nënë Tereza”, në terminal nga dera e cila përdoret për zjarrfikëset dhe të kamufluar me një mjet me mbishkrimin “Hetimi Tatimor” ku kanë grabitur të maskuar miliona euro që ndodheshin në mjetin blind të firmës “Nazeri 00”.
Paratë ishin të një banke të nivelit të dytë në Shqipëri.
Burimet thonë se grabitësit e tjerë janë nisur drejt Fushë-Krujës, ndërsa një mjet i dyshuar si i përdorur prej tyre po digjet në shkallën e Tujanit. Policia ka bllokuar të gjithë akset kyçe ku dyshohet se mund të kalojnë grabitësit. Fillimisht u raportua se ishin 2 të vdekur, një nga grabitësit dhe një roje e firmës security që po transportonte paratë, por policia sqaroi se bëhej fjalë vetëm për një viktimë.
Informacion paraprak:
Pak minuta më parë, pranë aeroportit ndërkombëtar “Nënë Tereza”, në Rinas, dyshohet se disa persona ende të paidentifikuar, me maska dhe armë pasi kanë thyer derën e rrethimit që përdoret nga shërbimet zjarrfikëse, kanë grabitur një sasi lekësh në pistën e avionit dhe janë larguar.
Në ndjekje të tyre janë vënë forcat e FNSH dhe ato të Policisë Kufitare të Rinasit.
Gjatë ndjekjes në një rrugë dytësore, autorët kanë shkëmbyer zjarr me Policinë, e gjatë këtij shkëmbimi ka humbur jetën njëri prej autorëve të grabitjes. Policia ka gjetur ndërkohë dhe bllokuar një mjet fugon.
Forca speciale policore si RENEA e FNSH, të ndihmuara nga një helikopter janë ende në ndjekje të autorëve të grabitjes.
Të angazhuara në operacionin e gjerë janë edhe forca nga Policia e Tiranës, Lezhës, Dibrës e Durrësit.
Discussion about this post