Prokuroria e Krimeve të Rënda dhe Policia e Shtetit kanë bërë një reagim pak minuta më parë duke përgënjeshtruar të gjitha reagimet e mediave lidhur me grabitjen spektakolare të Rinasit në fillim të këtij muaji.
Sipas Prokurorisë dhe Policisë së Shtetit të gjitha publikimet e mediave ditën e sotme në lidhje me ngjarjen e 9 prillit janë të pavërteta dhe të pasakta.
Ndërkohë që në reagimin për mediat po ashtu Prokuroria bën me dije se “së bashku me agjensi të tjera ligj zbatuese mbeten shumë të angazhuara për zbardhjen sa më të shpejtë të rrethanave të grabitjes, zbulimit të autorëve dhe përballjen e tyre me drejtësinë.” Po ashtu ajo u bën thirrje çdo qytetari që ka informacion në lidhje me hetimin të telefonojnë falas në numrin 112, duke ju garantuar anonimatin.
Kujtojmë se në media gjatë ditës së sotme janë bërë me dije identitetet e dy personave të dyshuar si të lidhur me ngjarjen. Sipas mediave, njëri prej personave i lidhur me grabitjen e Rinasit pas Admir Murataj, është Klement Çala, 31 vjeç nga Elbasani, ndërsa personi i tretë është Aleks Pepa, të dy këta persona të lidhur me grabitje të mëparëshme në aeroportin e Rinasit.
Njoftimi i plotë:
Reagim i Prokurorisë së Krimeve të Rënda dhe Policisë së Shtetit
Lidhur me disa publikime në media ditën e sotme, për hetimet mbi grabitjen e datës 9 prill 2019 në Rinas, grupi i posaçëm hetimor deklaron se këto lajme janë të pavërteta dhe të pasakta.
Duke përfituar nga ky komunikim me mediat dhe publikun, gatantojmë qytetarët se Policia e Shtetit, Prokuroria dhe agjenci të tjera ligj zbatuese mbeten shumë të angazhuara për zbardhjen sa më të shpejtë të rrethanave të grabitjes, zbulimit të autorëve dhe përballjen e tyre me drejtësinë.
Çdo qytetar që ka informacion që beson se ndihmon hetimin, mund të telefonojë falas në numrin 112, duke ju garantuar anonimatin.
Discussion about this post