Grabitja e shtëpive të futbollistëve është kthyer në një trend të frikshëm kohët e fundit, sidomos në Spanjë. Shtëpia e radhës që është grabitur ka qenë ajo e mesfushorit të Atletikos së Madridit, Thomas Partey.
Ganezi, i cili momentalisht ndodhet në Moskë me ekipin e tij në kuadër të takimit që Atletiko do të luajë ndaj Lokomotivës së Moskës, ka marrë një zgjim të hidhur ditën e sotme, teksa është njoftuar se shtëpia e tij është grabitur.
Për fat, dëmi i vetëm që kanë bërë hajdutët ka qenë financiar, teksa kanë vjedhur disa sende të çmuara. Në shtëpinë e Thomas atë moment ndodhej vetëm një punonjëse, e cila për fat të mirë nuk ka pësuar asnjë lëndim.
Autoritetet spanjolle janë vënë në lëvizje për të kapur sa më shpejt autorët. Ky është rast i përsëritur në Spanjë, teksa më parë janë grabitur edhe shtëpitë e Alvaro Moratas, Jordi Albas apo brazilianit Arthur.
