Greqia ekstremiste: Flamuri grek në kalanë e Himarës, parrulla për “Vorio-Epirin dhe gjuhë e dhunës

Një ditë më parë ministri grek i Mbrojtjes, Panos Kammenos, paralajmëroi zyrtarisht Shqipërinë dhe Turqinë duke thënë se Forcat e Armatosura greke janë gati për çdo aksion. Sot që në mëngjes herët, kanë ndodhur një varg incidentesh dhe veprimesh ekstremiste

Në një foto të publikuar nga “Balkanweb” dallon qartë flamuri grek i ngritur mbi kalanë e Himarës.
Sipas raportimeve të portalit, flamuri është ngritur këtë mëngjes në hyrje të kalasë, pikërisht në pjesën më të dukshme të saj për vizitorët e turistët.

Ndërkohë në aksin rrugor kombëtar Tepelenë-Gjirokastër po këtë mëngjes janë shkruar me sprajt parrulla për “Vorio-Epirin”.

Sikur kjo të mos mjaftonte, pjesë e kësaj gjuhe ekstremiste janë bërë edhe mediat.

Gazeta e përditshme “Stohos” është hapur me një kryeartikull ku i bën thirrje autoriteteve greke të dëbojnë të gjithë emigrantët shqiptarë. Sipas këtij shkrimi, shqiptarët janë “kolona e pestë e Turqisë në Greqi”.

Me anë të një fotomontazhi “Stohos” e krahason flamurin tonë kombëtar me atë të Turqisë duke vendosur përballë një ushtar grek të acaruar që i gjuan me plumba.

Të gjitha këto kanë nisur pa u mbushur as 24 orë nga deklaratat provokuese të ministrit grek të Mbrojtjes, Panos Kammenos, i cili paralajmëroi se “Greqia nuk mund të pranojë sfida dhe referenca që ndikojnë në historinë dhe të drejtën ndërkombëtare”.