Epidemia e gripit ka rënduar gjendjen e të sëmurëve në Sanatorium. Sipas raportimeve të fundit, në spitalin “Shefqet Ndroqi”, disa pacientë të sëmurë kronikë kanë ndërruar jetë si pasojë e përkeqësimit të tyre nga gripi.
“Kemi pasur 4-5 vdekje gjatë kësaj periudhe, kryesisht të të sëmurëve kronikë që nuk kanë arritur të mbijetojnë. Gripi është bërë komplikacioni që i ka çuar në atë gjendje”, thotë mjeku pneumolog Arjan Mezini për TCH.
Mjekët pneumologë sqarojnë se komplikacionet e këtij gripi mund të shkaktojnë pasoja fatale për jetën, ku më të rrezikuarit mbeten ata që vuajnë nga sëmundjet pneumoni kronike, diabeti dhe sëmundjet kardiovaskulare.
Si pasojë e gjendjes gripale, në spitalin “Shefqet Ndroqi” është shtuar numri i vizitave të zakonshme, edhe nga persona që nuk kanë vuajtur kurrë më parë.
“Duke filluar nga 31 dhjetori ka patur një fluks që s’është i zakonshëm për urgjencën e spitalit tonë. Bëhet fjalë për 70 deri në 100 persona në ditë, që janë trefishi i ngarkesës të një dite të zakonshme. Kemi kaluar në shërbim të përforuar me 3 mjekë”, thotë Mezini.
Ndër të tjera, Mezini paralajmëron se kjo situatë e rëndë do të vazhdojë. “Do ketë një rritje, 2 javët e ardhshme do të jenë shumë problematike dhe më pas, si çdo cikël, do të vijë duke rënë”, përmbyll ai. (D.D/Shuplaka)
Discussion about this post