Juventus është në pritje të përfundimit të finaleve të Champions dhe Euopa League, për të bërë një sulm drejt njërit mes Mauricio Pochettino dhe Maurizio Sarri.
Emri i Pep Guardiola ishte thjesht një spekulim i momentit për të bërë bujë, sepse trajneri spanjoll ndodhet në kushtet më të favorshme tek Manchester City, duke qenë se ka pushtet absolut në atë që mendon dhe vepron, ndodhet në ligën më të fortë në botë dhe është i rrethuar nga një “parajsë” financiare.
“The Guardian” ka analizuar se Sarri është i arritshëm nga klubi italian duke qenë se ka edhe dy vite të mbetura në kontratë dhe mjaftojnë 5 milionë paund për ta marrë, por mund të shkarkohet edhe nga vetë klubi i Chelsea dhe të kalojë direkt tek “Zonja e Vjetër”.
Pista tjetër është e Pochettino, i cili ka ngritur hije dyshimi me deklaratën e tij, ku tha se nëse fiton finalen e Champions League do të largohet nga Tottenham, sepse s’ka çfarë t’i japë më asaj skuadre.
Këto mbeten dy emrat e preferuar nga Juventus, por gjithmonë një alternativë është edhe Simone Inzaghi, që mund të kalojë nga Lazio tek klubi torinez.
