Një tentativë grabitje është shënuar rreth orës 00:17 pas mesnate në rrugën “Hamdi Cenoimeri” në kryeqytet. Pre ka rënë një bankë e nivelit të dytë.
Burime të Policisë së Tiranës, të cilët u janë referuar kamerave të sigurisë së bankës, emri i të cilës nuk dihet ende, bëjnë të ditur se autori ka hyrë në bankë pasi ka thyer me gur xhamin e hyrjes kryesore.
Ai ka kontrolluar për rreth 20 sekonda sirtarët e bankës dhe më pas është larguar, pa marrë asgjë, sipas punonjësve. Autori, identiteti i të cilit nuk dihet, i ka kryer veprimet me shpejtësi gjatë momentit të aktivizimit të sinjalit të alarmit.
Grupi hetimor ka nisur punën për identifikimin dhe kapjen e autorit të kësaj tentative grabitje. Nga informacionet e deritanishme, dyshohet se autori është një 25-vjeçar i shpallur në kërkim. (XH.A/SHUPLAKA)
