Deputeti i Partisë Socialiste në Kavajë, Parid Cara ka habitur me një status të pak minutave më parë, ku kërkon të garojnë kandidatë të pavarur në zgjedhje, në vend të opozitës.
Sipas Carës, qytetarët e Kavajës meritojnë më shumë se një kandidat në zgjedhje dhe kjo duket të jetë arsyeja pse ai fton të gjtihë të pavarurit të garojnë në zgjedhje.
“Në mungesë të opozitës në zgjedhjet e 7 Majit, çdo kandidat i pavarur duhet inkurajuar të kandidojë për Bashkinë e Kavajës. Qytetarët kavajas meritojnë të kenë më shumë se një kandidaturë…atë të Qeverisë për të zgjedhur”,- thotë Cara.
Bashkia e Kavajës shkoi në zgjedhje lokale të parakohshme për shkak të ndërprerjes së mandatit të Elvis Rroshit, që u prek nga ligji i dekriminalizimit.
Ndërkohë, PD ka deklaruar se do të bojkotojë zgjedhjet dhe nuk do të lejojë që të zhvillohen.
Kandidatja e Aleancës për Shqipërinë Europiane në zgjedhjet lokale për Bashkinë e Kavajës që do të zhvillohen në datë 7 Maj, pritet të jetë Silvana Daja, bashkëshortja e Gentian Dajës, kryetar i degës së Partisë Socialiste të Kavajës.
Asambleja e Partisë Socialiste të Kavajës ka propozuar 6 emra, mes të cilëve edhe gruaja e kryetarit të PS, Gentian Daja, ndërsa fjalën e fundit do ta thotë Kryesia e PS.
E për të mos ndikuar tek kjo zgjedhje, Gentian Daja lajmëroi edhe dorëheqjen nga posti partiak.
Ish-kryebashkiaku Rroshi, sipas të dhënave të mbërritura nga organet e Drejtësisë në Zvicër dhe Itali, rezulton se ka precedentë penalë në trafik droge dhe përdhunim.
Në lidhje me rastin e trafikimit të drogës, rezulton se për njërin nga emrat e përdorur nga Elvis Rroshi, ka edhe aktualisht një hetim.
Sipas përgjigjes së ardhur nga autoritetet italiane, rezulton se shtetasi Ervin Rroshi, lindur më 03.12.1975 është dënuar për një përdhunim të kryer në vitin 1995 në Campobasso. Referuar përgjigjes së ardhur nga jashtë në Prokurori, në të njëjtën ditë është lëshuar një dekret për ekspuls, pra për ta përzënë shtetasin në fjalë nga Italia.
(M.D/ Shuplaka)
