Deputetja e Partisë Demokratike, Rudina Hajdari ka folur sot për vendimin e saj për të mos djegur mandatin e deputetes, për marrëdhëniat që ka me ndërkombëtarët si dhe nuk i ka kursyer as kritikat për kryetarin e PD-së, Lulzim Bashën.
Hajdari u shpreh se vendimin mbi djegien e mandatave Basha e ka marrë personalisht dhe pa u konsultuar me bazën e partisë, ndërkohë që shtoi më tej se do të kërkojë së shpejti transparencë për partitë politike që nga financimi deri tek zgjedhja e kandidatëve, ndërsa shtoi se “nëse nuk qeveris dot shtëpinë tënde nuk mund të qeverisësh vendin”.
Hajdari shkoi më tej me deklaratat e saj kur tha se “nëse nuk qeveris dot shtëpinë tënde nuk mund të qeverisësh vendin”, duke lënë kuptohet se po kërkonte largimin nga drejtimi i PD të Lulzim Bashës.
E pyetur nëse janë amerikanët pas Rudina Hajdarit, deputetja e PD-së u shpreh se sigurisht që ajo konsultohet me “miqtë e huaj”.
“Sigurisht që unë këshillohem me miq të huaj, kam punuar në Kongresin Amerikan, por nuk besoj dhe nuk mendoj se jam e privilegjuar prej tyre. Unë jam pjesë e komisionit të Jashtëm, atij të Integrimit, dhe interesohem nga afër për procesin e integrimit të Shqipërisë. Ne duhet të shohim një lloj mekanizmi që t’i provojmë liderët tanë në opinionin publik”, tha Hajdari në emisionin “Open”.
Deputetja u ndal edhe tek zërat nëse po përgatitet për një parti të re, duke theksuar se nuk është momenti për këtë gjë.
“Nuk besoj se është momenti për këtë gjë. Unë besoj se është koha e duhur për të bërë disa reforma të rëndësishme, si ajo e Kodit Zgjedhor, që do të sjellë shumë ndryshime, e ndoshta edhe ndryshim të sistemit politik. Ajo që dua unë të shoh është të kemi një tryezë që përfshin të gjithë faktorët politik, që të flasë për një reformë të thellë qoftë për partitë politike, ashtu dhe për Kodin Zgjedhor”, tha Hajdari.
