Hajduti i celularëve Erind Vogli, i cili ishte shndërruar në tmerrin e Tiranës, mësohet se punonte në zyrën e Komunikimit në Kryeministri.
Në redaksinë e “Shuplaka-s”, ka mbërritur dokumenti ku sekretari i Përgjithshëm i Kryeministrisë Ëngjëll Agaçi ka firmosur urdhrin për shkarkimin e Erind Voglit, i cili punonte si kameraman në sektorin e informacionit, në Drejtorinë e Informacionit në këtë institucion, i cili është edhe më i rëndësishmi në Shqipëri.
Dokumenti është i datës 5 qershor të këtij viti, ku thuhet se Vogli i cili është arrestuar sot nën akuzën për vjedhje celularësh, ka dhënë dorëheqjen nga detyra.
Në dokument thuhet gjithashtu që marrëdhëniet financiare mes dy palëve ndërpriten më datë 12.05.2017.
Ndërkohë pak orë më parë, “Shuplaka” publikoi disa foto ku Erind Vogli, shfaqet në një takim privat me kryeministrin Edi Rama ku janë fotografuar të buzëqeshur.
Në një marrëdhënie po kaq personale, ai është shfaqur edhe në krah të kryetarit të Bashkisë së Tiranës, Erion Veliaj, me të cilin shfaqet miqësisht duke goditur grushtet.
39-vjeçari u arrestua në flagrancë nga policia gjatë operacionit të koduar “Taktika”. Ai akuzohet për vjedhje të kryera në zonën e “Pazarit të Ri”, në rrugën “Luigj Gurakuqi”, në “Rrugën e Kavajës” dhe atë të “Ibrahim Rrugovës”. (D.D/Shuplaka)
