Me 11 mars janë hapur aplikimet për kredi te buta, ku 90 kuota janë marrë nga Ministria e Brendshme.
Për këtë vit nga ndarja që është bërë nga Ministria e Brendshme, vetëm 25 efektivë policie nga 12 mijë në total, do të kenë mundësinë që të marrin kredi të butë. Pra, këtë vit vetëm 0.002% punonjësve të policisë mund të marrin kredi të butë. E thënë ndryshe 1 në 500 policë do të përfitojë kredi të butë.
15 kuota do të ndahen për gardën, 10 për AMP ndërsa 40 kuota te tjera do të jenë për aparatin përbërës të Ministrisë së Brendshme dhe institucioneve të varësisë. Aplikimi për kredi të butë do të bëhet në portalin e-albania. Pasi në bazë të disa kritereve do të bëhet edhe pikët se kush përfiton dhe më pas del në komision.
Praktikisht, një nga institucionet më të mëdha në vend, Policia e Shtetit, që ka në organikën e saj 12 mijë punonjës, duhet të ketë edhe numrin më të lartë të kuotave. Madje, kur u bënë ndryshimet në ligj, u deklarua që përfituesit më të shumtë do të jenë punonjësit e policisë.
Ky është viti i tretë që përfitohet kjo kredi. Në dy vitet e para, vëmendja dhe fokusi ka qenë te Policia e Shtetit. Pra, në vitin e parë 100% e kuotave i kaluan këtij institucioni ku rreth 100 punonjës policie në vitin 2023 përfituan nga kredia e butë, ndërsa në vitin e dytë u ndanë mes Policisë së Shtetit, Gardës së Republikës dhe Autoritetit të Mbikqyrjes Policore, në total rreth 300 kuota.
Ndryshe nga vitet e shkuara, kur pjesë e Komisionit të Vlerësimit të aplikimeve ka qenë edhe një zyrtar nga Drejtoria e Policisë, kësaj here, Komisionet e Vlerësimit drejtohen nga Ministria e Brendshme.
Dokumentet e hartuara nga Ministria e Brendshme dhe ajo që vihet re është fakti se në komisionet e vlerësimit të aplikimeve, përfshirë edhe sekretariatin teknik në mbështetje të komisionit të shqyrtimit të ankesave, dhe mbështetësit e Komisionit të Shqyrtimit të Ankesave, përbëhen vetëm nga punonjës të Ministrisë dhe nuk ka në mesin e tyre asnjë emër nga institucionet përkatëse përfituese të kuotave.
Discussion about this post