Sekretari i Përgjithshëm i OSBE Thomas Greminger, gjatë vizitës së sotme në Tiranë ka mbajtur një qëndrim tjetër nga ai i shprehur disa ditë më parë nga ambasadori Bernd Borchardt, për ndërmjetësimin e paleve politike për uljen në dialog.
Gjatë konferencës së përbashkët me Ministrin në detyrë për Punët e Jashtme, Gent Cakaj, Greminger u shpreh se OSBE është e gatshme të ofrojë tre gjëra në kuadër të Reformës Zgjedhore:
1- Të sjellë ekspertizë teknike për standardet zgjedhore;
2- Të kujtojë angazhimet që duhet të përmbush Shqipëria në kuadër të Reformës Zgjedhore;
3- Të ndërmjetësojë dialogun mes palëve politike.
Ndryshe nga sa më herët partnerët ndërkombëtarë e kishin lënë në duart e palëve politike si një detyrë për të zgjidhur krizën dhe gjetur rrugën e dialogut, në këtë propozim duket qartë se faktori ndërkombëtar sot është pozicionuar pro ndërmjetësimit, në njëfarë mënyre nëse mazhoranca dhe opozita do të ishin dakort.
Diçka e tillë është shprehur edhe nga opozita e bashkuar, ku duke e prononcuar për Reformën Zgjedhore, ka deklaruar se do të pranojë të ulet në të njëjtën tryezë me mazhorancën vetëm me garancinë ndërkombëtare.
Një nga 9 kushtet e Bundestagut gjerman është ulja e të gjithë aktorëve politik për të gjetur zgjidhje të përbashkët për realizimin e Reformës Zgjedhore.
Duke pasur parasysh deklaratat e opozitës, qëndrimin e Gjermanisë, dhe së fundmi deklaratën e zyrtarit të lartë të BE-së, tashmë mbetet edhe të mësojmë qëndrimin që do të mbajë mazhoranca për këtë çështje.
Kujtojmë se opozita për Reformën Zgjedhore ka kërkuar të ngrihet një strukturë e posaçme me një përfaqësues të Parlamentit dhe një përfaqësues të opozitës, me prezencën, monitorimin dhe ndërmjetësimin e përfaqësuesve të komunitetit ndërkombëtar.
(F.GJ/FAXWEB.AL)
Discussion about this post