Kryeministri I Kosovës, Ramush Haradinaj, ka ripërsëritur se kufiri i Kosovës është në Çakorr dhe Kullë. Ai thotë gjithashtu se Komisioni që nisi punën sot do të zbulojë të vërtetën.
“Kufiri është në Çakor edhe në Kullë nuk ka nevojë kërkush me na tregu për disponimin e tjetërkujt, nuk ka nevojë askush me na dhënë leksione të çfarëdo natyre”, tha Haradinaj.
Haradinaj tha se nuk ka ndonjë kërkesë për Malin e Zi derisa nuk të ketë rezultate nga komisioni.
“Aktualisht unë s’kam ndonjë kërkesë konkrete për Malin e Zi sepse unë pres me i gjetë të gjeturat e Komisionit. Dua ta di se çka kam në dorë dhe çka po synoj por kuptohet se s’ka marrëveshje të njëanshme për kufi. Pse e ka ratifiku Mali i Zi kjo nuk na obligon ne”, tha Haradinaj për RTK.
“Ky Komision sot ka fillu punë zyrtarisht dhe ky e gjen të vërtetën se çka ka ndodh në procesin paraprak, ku janë lëshimet, ku janë gabimet dhe atë të vërtetë do të na e raportojë Qeverisë, parlamentit dhe popullit por edhe miqve. Kur e kemi atë të vërtetë do të analizojmë se në çfarë drejtimi me shku me këtë temë”, tha ai. (B.H/Shuplaka)
