Ish-kryeministri i Kosovës, Ramush Haradinaj, ka reaguar nga Franca lidhur me deklaratat e presidentit serb Nikoliç, i cili kërkoi në OKB që bota të mbajë qëndrim ndaj Haradinajt pasi ai ka kërcënuar me luftë Serbinë.
Haradinaj shkruan sot se është Nikoliç që ka kërcënuar Kosovën me luftë. Dhe në tilla rrethana, Haradinaj, thotë se ai nuk duhet të presë nga pala tjetër ta presë me lule.
Ramush Haradinaj thotë se kushdo që i fut duart në Kosovë, do ta marrë të njejtën përgjigje si Millosheviçi në vitin 1998-1999.
SHKRIMI I PLOTË:
Tomisllav Nikoliq po e kërcënon Kosovën me luftë, e jo Ramush Haradinaj Serbinë
Nikoliq paska kërkuar në Këshillin e Sigurimit që Bota të marrë qëndrim ndaj meje, sepse unë e paskam kërcënuar Serbinë me luftë!
Tomisllav Nikoliqi, ka qenë ai që para pak kohe, ka deklaruar se është i gatshëm që bashkë me djemtë e tij, të shkojë në Kosovë për të luftuar!
A mos paska kujtuar ky Zotnija se ne do ta presim me lule?!
E kam thënë dhe gjithmonë do ta përsëris, se kushdo që i fut duart në Kosovë, do ta marrë të njejtën përgjigje si Millosheviqi në vitin 1998-1999!
Ata le të rrijnë në vendin e tyre e ta lënë Kosovën rahat e të mos i bijnë në qafë as asaj e as mua!
Unë e kam mbrojtur vendin tim dhe gjithmonë do ta mbroj dhe këtë mund ta marrin “kërcënim me luftë” vetëm ata që janë të sëmurë si ky farë Nikoliqi.
Ai, së pari duhet të tregojë se ku janë varrezat masive me shqiptarë në Serbi, që ende i mban sekret e tu kërkojnë falje shqiptarëve për krimet e Serbisë në Kosovë, e jo të merret me retorikë boshe!
