Kryeministri i Kosovës Ramush Haradinaj ditën e sotme ka vendosur që të shtyjë votimin e kërkesës së Kosovës për anëtarësim në Interpol.
Nëpërmjet një njoftimi për mediat, thuhet se anëtarësimi i Kosovës në Interpol është kontribut direkt në luftën kundër krimit ndërkombëtar dhe terrorizmit, mirëpo vendet që kanë shprehur besimin tek Kosova nuk janë mjaftueshëm.
“Republika e Kosovës është e gatshme që të marrë përgjegjësitë e plota si anëtare e Interpolit. Besimin në Kosovën si anëtare e Interpolit e kanë shprehur tashmë shumë vende, por jo në numër të mjaftueshëm që Kosova të anëtarësohet në këtë organizatë”, thuhet në deklaratë.
Kështu, Haradinaj ka falënderuar për bashkëpunimin institucionet e Kosovës, por edhe të gjithë partnerët ndërkombëtarë, të cilët i ka ftuar që në takimin e radhës të punohet që Kosova të votohet më në fund. (D.D/Shuplaka)
