Edit Harxhi ka rrëfyer sot në ”Fax News” komunikimin që ka patur me Arben Ristanin, teksa i kërkonte përdorimin e selisë së PD-së për konferencë shtypi.
”Dua të them diçka e cila ka shpëtuar. Disa ditë përpara se ne të dilnim në konferencë shtypi për ndryshimet, ne i kemi kërkuar Z.Ristani që këtë konferencë shtypi ta bënim në PD. Përgjigja ka qenë: ne nuk mund ta bënim atje, se nuk e shihte të arsyeshme. Përgjigja ime për z.Ristani është se unë nuk jam palë!”, rrëfeu demokratja.
”Ne nuk është se kemi bërë një plan se çfarë do ndodhë në ditët e ardhshme, ky nuk është një aksion politik ne mendojmë se propozimi është konstruktiv.
Letra shoqëruese e ndryshimeve statutore, në 77 nene të statutit tonë, në këto ndryshime ne kemi patur parasysh që anëtarësia është ajo që do thotë fjalën e saj.
Unë shpresoj shumë që Z.Basha të mbledhë Këshillin e partisë. Një nga handikapët e mëdha të PD-së, që theu hekurin dhe çliroi shqiptarët nga izolimi komunist, është që nuk ka arritur të mbledhë forumet e saj.
Forumi i vetëm ku këto propozime duhen bërë është Këshilli Kombëtar i PD-së! Shpresoj që z.Basha t’ia paraqesë. Nuk ka patur përgjigje zyrtare, shpresoj që Z.Basha të mos bëjë të paditurin, jemi siguruar që t’i shkojë në zyrë materiali.
Partia aktualisht është e përçarë dhe për këtë Z.Basha është përgjegjës! Z.Basha nuk ka bërë asnjë përçapje që nga korriku për të bashkuar partinë! Duhet të mblidhte në një tryezë të gjithë personalitetet e partisë!
Unë nuk mendoj që problemi qëndron te Z.Basha. Problemi është z.Basha! ”, ka theksuar më tej Harxhi.
E pyetur për mbështetjen e Astrit Patozit për propozimet e tyre, Harxhi komentoi:
”Z.Patozi është një personalitet me shumë vlerë në PD, e kam vlerësuar dhe vlerësoj kontributin e tij në parti. Kam mbështetur fuqimisht platformën e Z.Patozi…por mendoj që PD është kaq e hapur dhe e madhe sa çdokush mund të jetë i lirë të mendojë se cilat ishin shkaqet që e sollën këtë shkatërrim.
Unë personalisht mendoj që një nga shkaqet është edhe statuti.”
Por nga ana tjetër, e pyetur nëse kanë qenë në kontakt me Z.Berisha dhe nëse ai i ka mbështetur për propozimin e ndryshimeve statutore, Harxhi tha se nuk ka patur kontakt së fundmi, duke rikujtuar se Berisha ka qenë vetë në media, ku ka shprehur qëndrimet e tij se ishte një grup që po paraqiste propozimet dhe shprehu qëndrimet e tij se ishte njeri i statutit. ” Ishte një dritë jeshile!”, interpretoi Harxhi.
(V.G/Faxweb)
