Presidenti i Kosovës Hashim Thaçi, në një intervistë të dhënë për “Radio Evropa e Lirë” është shprehur se ka marrë konfirmimin nga koalicioni fitues i zgjedheve që është PAN dhe mandatari për kryeministër Ramush Haradinaj, se Qeveria e ardhshme e Kosovës do të formohet shumë shpejtë.
“çështja e mandatit nuk është çështje e preferencës, por e respektimit të legjitimitetit qytetar”. “Kosova e ka koalicionin fitues që ka dalë nga zgjedhjet e 11 qershorit. Unë do të respektoj Kushtetutën, ligjet dhe vendimet e Gjykatës Kushtetuese të vitit 2014, prandaj kam konfirmimin edhe nga mandatari i koalicionit fitues se ka siguruar numrat e mjaftueshëm të deputetëve për themelimin e Qeverisë së re”, tha Thaçi.
Ndërkohë në lidhje me mundësisë që mandatari i koalicionit PAN, Ramush Haradinaj të dështojë të sigurojë votat për formimin e Qeverisë dhe mundësisë që Thaçi më pas t’ia jap mandatin kandidatit të Lëvizjes Vetëvendosje, Albin Kurti, presidenti Thaçi tha se nuk mund t’i parashikojë as paragjykojë zhvillimet e ardhshme.
“Nuk dëshiroj të predikoj. Nga mandatari (Ramush Haradinaj) e kam konfirmimin se i ka siguruar votat. Në çdo rrethanë mendoj se duhet të ndodhë një dialog mes spektrit politik si të veprohet tutje. Unë do të ndërmarr vetëm veprime ligjore, kushtetuese pa ndikime politike”, tha Thaçi. (S.SH/Shuplaka)
Discussion about this post