Presidenti i Kosovës Hashim Thaçi është nisur drejt New Jork-ut, në krye të delegacionit të Kosovës. Thaçi do të marrë pjesë në në seancën e radhës të Asamblesë së Përgjithshme të Kombeve të Bashkuara.
Ai shoqërohet nga Zonja e Parë e shtetit, Lumnije Thaçi.
Në këtë vizitë, Thaçi pritet të takohet me presidentin e Shteteve të Bashkuara Donald Trump. Sipas një njoftimi të Presidencës, presidenti Thaçi dhe Zonja e Parë e Kosovës do të priten nga çifti presidencial Trump.
“Gjatë vizitës pesëditore në Nju Jork, presidenti Thaçi do të zhvillojë takime të shumta bilaterale me krerë të shteteve dhe udhëheqës të organizatave të ndryshme ndërkombëtare. Presidenti Thaçi gjithashtu do të marrë pjesë edhe në takimin e krerëve të gjashtë shteteve të Ballkanit Perëndimor, me nikoqire Përfaqësuesen e Lartë të Bashkimit Evropian për Punë të Jashtme dhe Politikë të Sigurisë, Federica Mogherini. Në delegacionin e Kosovës është edhe zëvendës kryeministri dhe ministri i Jashtëm, Behgjet Pacolli”, thuhet në njoftimin e Presidencës së Kosovës. (D.D/Shuplaka)
Discussion about this post