Presidenti i Kosovës, Hashim Thaçi thotë se nuk ka frikë nga drejtësia pasi UÇK-ja ka bërë luftë të pastër dhe të drejtë, ndërsa situatën e krijuar për Gjykatën Speciale e quan panic të panevojshëm.
Thaçi tha në një intervistë me Zërin e Amerikës se vendimi për ngritjen e Gjykatës së Posaçme është në fuqi dhe se Kosova nuk i shmanget drejtësisë.
“Realisht Kosova as ka qenë, as është e as do të jetë ndonjëherë kundër sistemit të drejtësisë. Kosova ka dëshmuar bashkëpunimin më të mirë prej të gjitha vendeve të ish-Jugosllavisë me Tribunalin e Hagës, duke u dorëzuar vullnetarisht në akuzat e para që kanë ndodhur edhe pse janë dëshmuar përsëri si të pafajshëm të gjithë të akuzuarit”, tha ndër të tjera ai.
I pyetur nëse ka frikë nga Gjykata Speciale, Thaçi tha se ai nuk ka frikë nga drejtësia.
“Nga drejtësia nuk kam, nuk kam pasur dhe nuk do të kem kurrë dhe është mirë që Kosova ka qenë shembulli më i mirë në rajon për bashkëpunim me drejtësinë. Kosova nuk ka asgjë për të fshehur, Ushtria Çlirimtare e Kosovës ka zhvilluar luftë të pastër si loti; është lëvizja guerile më e suksesshme që ka ndodhur ndonjëherë në botë; ne nuk kemi sulmuar askënd; kemi zhvilluar luftën për ta larguar Serbinë nga Kosova dhe kjo është fitorja më e madhe e kombit”, ka deklaruar ai.
Presidenti I Kosovës debatet për Gjykatën Speciale tha se i sheh në frymën e demokracisë, ndërsa për miratimin e saj shtoi se e kishte bërë për të mos pridhur raportet me BE-në dhe Washingtonin.
(B.H/Faxweb)
Discussion about this post