Presidenti i Kosovës, Hashim Thaçi, ndodhet në Washington pikërisht pak ditë larg ndërrimit të administratave. I pyetur nga “Zëri i Amerikës” për synimin e kësaj vizite, ai rrëfeu se fillimisht ka ardhur për të falënderuar presidentin Barack Obama, zëvendës-presidentin Joe Biden për mbështetjen e fuqishme që i kanë dhënë Republikës së Kosovës, paqes dhe stabilitetit në Kosovë dhe rajon. Veç kësaj, edhe për për të vazhduar me hapa të mëtutjeshëm me administratën e re të presidentit Donald Trump.
Lidhur me pritshmëritë e tij për administratën e re amerikane në raport me Kosovën, Kreu i Lartë i Shtetit të Kosovës bëri me dije se është duke vendosur kontaktet e para me njerëzit e rinj të Departamentit të Shtetit dhe të Mbrojtjes.
Sa i takon homologut Trump, ai tha se shpreson në mbështetjen e Donald Trump për Kosovën, pavarësisht se dihet që vëmendja nuk do të jetë e njëjtë me atë të mëparshmen.
“Është fat që çështja e Kosovës nuk ka qënë e lidhur vetëm me një kamp politik në Uashington por ka qënë një politikë zyrtare e Shteteve të Bashkuara të Amerikës, një mbështetje e dy kampeve politike edhe republikan edhe demokrat sepse në kohën e presidentit Clinton ne kemi fituar lirinë dhe jemi çliruar dhe në kohën e presidentit Bush kemi fituar pavarësinë ndërsa në kohën e presidentit Obama jemi konsoliduar si shtet. Unë pres që edhe administrata e re e presidentit të ri Trump të mbështesë Kosovën. Këto ditë kam patur kënaqësinë që të vë kontaktet e para me njerëzit e ri që mund të jenë në Departamentin e Shtetit, gjithashtu edhe në Departamentin e Mbrojtjes por edhe në departamentet e sigurisë që do të merren drejtpërdrejt me çështjet e Evropës, gjithashtu të Kosovës dhe të Ballkanit perendimor. Nuk mund të them se do të ketë vëmendje sikurse ka qenë më herët dhe është mirë pasi Kosova nuk është ndonjë vend i krizës, por jam i bindur se Shtetet e Bashkuara të Amerikës, administrata e re e presidentit Trump do ta mbështesin Kosovën në rrugën e saj për themelimin e ushtrisë së Kosovës, për futjen në partneritetin për paqe, dhe prespektivë të sigurtë për Nato. Kosova ka qënë, është dhe do të mbetet partneri më i besueshëm dhe falenderues i përjetshëm i Shteteve të Bashkuara të Amerikës për këtë mbështetje. Kështu që shoh edhe tek njerëzit e administratës së re vullnet dhe gatishmëri, por edhe vendosmëri që kauza e Kosovës të lëvizë në binarët e drejtë, në vlerat euro-atlantike.”, u shpreh presidenti Thaçi.
Discussion about this post