HEC-et në Osum, ministri Klosi: Do ta rrëzojmë, nuk ka shanse të ndërtohet

Ministri i Mjedisit dhe Turizmit Blendi Klosi ka thënë se uk ka shanse që të ndërtohet një HEC në afërsi të ujëvarës së kanioneve të Osumit, një atraksion i njohur turistik

Ai tha në emisionin “Opinion” se kjo ka qenë një leje e dhënë dy vite më parë, dhe e gjithë historia e koordinatave.

“Ajo çfarë ka ndodhur me ujëvarën e kanionit, ishte një shqetësim që u ngrit nga ata që adhurojnë mjedisin. E gjithë historia është ngritur mbi një gënjeshtër të koordinatave. Ne kemi ngritur një grup investigimi. Do ta rrëzojmë këtë leje mjedisore. Në atë pikë nuk ka asnjë shans që ai HEC të ndërtohet”, ka thënë ai.

Sipas dokumenteve, rezulton se leja për dy HEC-et mbi kanionin e Osumit është dhënë në mars të vitit 2015. Por sipas Agjencisë së zonave të mbrojtura parregullsitë ligjore në leje dhe ndërrimi i koordinatave ku do të ndërtohen HEC-et bëjnë lejen të paligjshme.

Në datën 10 janar të këtij viti, ministri i Turizmit, Blendi Klosi i është drejtuar zyrtarisht ministrit të Energjisë, Damian Gjiknuri që të anulojë koncesionet për HEC-et mbi Osum, pasi sipas tij, kontrata ka parregullsi ligjore dhe efekte shkatërruese për zonën, e cila gëzon statusin më të lartë të mbrojtjes mjedisore, atë të Monumentit të Natyrës.

(B.H/Faxweb)