Një projekt jo i zakonshëm dhe shumë kreativ është realizuar në fshatin Koshare të komunës së Ferizajt.
Disa banorë të këtij fshati, kanë vendosur në të gjitha rrugët kosha mbeturinash në formën e rrethit dhe të pajisur me një tabelë basketbolli. Ishte asamblisti i komunës së Ferizajt, Amir Rexhepi, ai që këtë iniciativë e ka shpërndarë në profilin e tij në Facebook.
“Në fakt është një ide e përbashkët e disa nga banorëve të fshatit, ide e cila menjëherë gjeti edhe përkrahje financiare brenda fshatit”, ka deklaruar ai.
“Ideja dhe qëllimi i vendosjes së këtyre shportave kreative, është që të nxisim banorët dhe kalimtarët, që t’i mbajnë më të pastër ambientet e fshatit tonë. Shpresoj që kjo sado pak do të bëjë atraktive hedhjen e mbeturinave aty ku e kanë vendin, në koshin e mbeturinave ” tha Rexhepi.
Pastërtia është një nga gjërat më esenciale në një shoqëri dhe mbajtja e saj, përveç ambientit më të mirë për sy, sjellë edhe të mira shëndetësore. Prandaj, kjo iniciativë është përshëndetur dhe pritur shumë mirë nga banorët e fshatit
