Lidhur me helmimin masiv të nxënësve në shkollën Postribë të Shkodrës, ka reaguar dhe drejtoria e spitalit të këtij qyteti.
Sipas bluzave të bardha në Urgjencë janë paraaqitur 26 nxënës nga shkolla e mesme e bashkuar Postribë me simptoma të tilla si të vjella, temperaturë, marrje mendsh.
Ndërkohë që 7 prej nxënësve janë duke marrë ende mjekim në spital, pjesa tjetër është larguar drejt banesave.
Reagimi i plotë i spitalit:
Spitali Rajonal Shkodër bën me dije se lidhur me ngjarjen e ndodhur mbrëmjen e së enjtes, ku janë paraqitur në Urgjencë 26 nxënës nga shkolla e mesme e bashkuar Postribë me simptoma të tilla si të vjella, temperaturë, marrje mendsh. Të gjithë nxënësit kanë marrë trajtimin e menjëhershëm mjekësor në Spitalin Rajonal të Shkodrës.
Në total janë paraqitur 26 raste nga ku 16 raste janë trajtuar në repartin infektiv dhe 10 raste janë trajtuar në repartin e pediatrisë.
Aktualisht 7 persona po marrin akoma shërbim në spital, 5 persona tek reparti i infektivit dhe 2 në pediatri, pjesa tjetër kanë lënë spitalin.
Pacientët janë nën monitorimin e vazhdueshëm të mjekëve, duke ndjekur mjekimet e rekomanduara.
Kujtojmë se një ndër pistat ku po hetohet është që nxënësit të jenë helmuar për shkak të konsumimit të ushqimit në Fast Food, po nuk përjashtohet as mundësia të ketë helmim nga kontaminimi i ujit.
Burime bëjnë me dije se janë shoqëruar dhe pronarët e Fast Food-it për t’u marrë në pyetje.
