Lëvizja Vetëvesndosje ka reaguar lidhur me helmimin e 26 punonjësve të Komisionit Qëndror të Zgjedhjeve në Kosovë pas hapjes së zarfave që mbanin brenda fletë votimi të ardhura nga Serbia.
Me anë të një shënimi në rrjetet sociale, VV shprehet se autoritetet duhet të hetojnë pakot e ardhura nga Serbia në mënyrë të organizuar nga ky shtet. Duke i konsideruar këto fletë si të kundraligjshme dhe të ardhura përmes zyrave ndërlidhëse e jo përmes postës, VV shprehet se këto vota duhen refuzuar.
Reagimi i plotë:
Reagim për helmimin e punonjësve të KQZ
Helmimi i punonjësve të operacionit të votimit përmes postës ka shqetësuar familjarët e stafit, por edhe opinionin publik. Autoritetet shtetërore duhet të hetojnë shkaqet e këtij helmimi, ashtu siç duhet të hetojnë pakot e ardhura nga Serbia në mënyrë të organizuar nga shteti i Serbisë.
Këto pako me fletëvotime nuk kanë ardhur përmes postës, ashtu siç e kërkon ligji për zgjedhje, por janë sjellë kundërligjshëm nga zyra ndërlidhëse e Serbisë.
Këto fletëvotime të sjellura kundërligjshëm duhet të refuzohen. Ndërsa shërbimi profesional i KQZ-së duhet ta vazhdojë punën në vlerësimin dhe numërimin e saktë të votave të ardhura nga mërgata.
Pakot me fletëvotime të dërguara nga bashkatdhetarët, e të cilat janë verifikuar dhe vlerësuar, duhet të dërgohen në Qendrën e Numërimit dhe të Rezultateve për t’u numëruar.
(F.GJ/FAXWEB.AL)
