Vrasja e 22-vjeçares shqiptare Ilaria Sula në Romë ka tronditur opinionin publik, ndërsa hetuesit po zbulojnë detaje gjithnjë e më të rënda rreth ngjarjes. Provat e mbledhura në banesën e Mark Samson, 23-vjeçarit që ka rrëfyer krimin, hedhin dritë mbi një skenar të ftohtë dhe të planifikuar, ku përpiqet të fshihet e vërteta.
Hetimet zbuluan një sërë gjurmësh të dyshimta: jastëkë të ndotur në kabinën e dushit, një njollë në murin e korridorit dhe shenja të ngjashme në lavaman, pjesën e pasme të karriges, në derën e makinës si dhe një kuti të vendosur mbi një dollap. Sipas të përditshmes italiane La Repubblica, këto janë vetëm disa nga provat që u gjetën në apartamentin e Samsonit, i cili pasi e vrau Ilarian, e futi trupin e saj në një valixhe dhe e hodhi në një shkëmb në periferi të kryeqytetit italian.
Në shumë nga këto prova janë gjetur gjurmë të “materialit biologjik” si flokë, pështymë dhe gjak. Megjithatë, një vëmendje e veçantë i është kushtuar leckës së njollosur me një substancë të kuqe, që besohet të jetë përdorur për të pastruar gjurmët e krimit pas vrasjes.
Nëse analiza do të konfirmojë se substanca është gjak, kjo do të përforcojë versionin e dhënë nga Samson dhe nëna e tij – të dy nën hetim për fshehjen e trupit – të cilët kanë pranuar se kanë ndihmuar në pastrimin e vendngjarjes. Gjithsesi, ekspertiza mjeko-ligjore është thelbësore për të përcaktuar momentin e saktë të vdekjes së Ilaria Sulas.
Mark Samson pretendon se e ka qëlluar Ilarian me thikë në fyt mëngjesin e 26 marsit, pak pasi i kishte çuar mëngjesin në dhomën e saj. Por ky version ngjall dyshime serioze. Sipas hetimeve, bazuar në të dhënat e celularit të viktimës, trupi i saj është larguar nga banesa në zonën Africano rreth orës 10:20 të së njëjtës ditë.
Në këtë interval kohor të ngushtë, Marku pretendon se ka kryer një sërë veprimesh: ka shërbyer mëngjesin, ka kryer aktin e vrasjes, ka dalë për të blerë disa produkte (faturat e gjetura e dëshmojnë këtë), ka pastruar vendin e krimit dhe më pas ka fshehur trupin në një karrocë. Ky rrjedhë e ngjeshur ngjarjesh ngre pikëpyetje serioze mbi vërtetësinë e deklaratës së tij.
Hetimet vazhdojnë me intensitet, ndërsa e gjithë ngjarja mbetet nën vëmendjen e mediave dhe publikut italian dhe shqiptar.
