Drejtueseja e Shoqatës së Personave që Jetojnë me HIV/AIDS, Olimbi Hoxhaj shprehet se parandalimi i përçimit të virusit HIV nga nëna tek fëmija është një histori suksesi për vendin tonë.
“Nuk ka raste të lindur ose të infektuar nga nëna pozitive në këtë vit. Ajo që mund të përmendim këtë vit është që kemi lindjen e bebit të 8 që është negativ nga prindër pozitiv dhe kjo është ndër historitë e suksesit në Shqipëri, në kuadrin e programit të parandalimit nga nëna te fëmija”
Hoxhaj bën të ditur për Ora News se duke filluar nga viti i ardhshëm, për herë të parë në Shqipëri, testi i HIV për gratë shtatzëna do të ofrohet falas.
“Vitin tjetër pas janarit do të pilotohet vitin e parë me mbështetjen e Fondit Global dhe pastaj do të futet si një testim rutinë dhe do të ofrohet aty ku janë nevojat, në këshillimoret e nënës dhe fëmijës”
Aktualisht në vendin tonë, për këtë vit janë regjistruar 81 raste të reja të diagnostikuar me HIV. Hoxhaj pohon se shqetësues është numri në rritje i rasteve me vdekje.
“Kemi 81 raste të reja të diagnostikuara me HIV, nga të cilat, 57 janë meshkujt, 24 janë femra dhe kemi rastin e një fëmijë në moshën 7-vjeçare. Numri total i rasteve është 1090 deri tani . Sivjet kemi 15 raste vdekjesh, nga të cilat 3 janë nga rastet e diagnostikuara këtë vit. Faktorët kryesorë kanë të bëjnë me diagnozën e vonë, në përgjithësi 70% e rasteve hyjnë në terapi në një diagnozë të vonë”
Sa i takon rrugëve të transmetimit, predominon ajo heteroseksuale, por nuk mbetet pas as ajo homo ose biseksuale, që mbetet e paraportuar, për shkak të fshehjes së këtyre marrëdhënieve.
“Është karakteristikë fakti që në momentin e testimit apo plotësimit të formularit nuk raportohet orientimi seksual ose sjellja seksuale që ka sjellë infektimin e individit” shprehet Olimbi Hoxhaj.
(M.Q/Faxweb)
