Është 65 vjeçe dhe sot duhet të shijonte pensionin. Por Natasha Fifo, tornitore një profesion i pazakontë për një femër vijon ende të punojë në punishten e saj. Madje edhe sot për 8 mars, kur gratë kanë dalë të festojnë ajo thotë se kurrë nuk ka festuar, por i është përkushtuar punës. Ndihet e lumtur që profesionin e saj ia ka trashëguar djemve, ndërsa shton se ka qënë vetëm 20 vjeçe kur ka nisur këtë zanat të rrallë për një grua.
Sot ndihmon djalin në punishte. 65-vjeçarja thotë se do të punojë deri sa shëndeti t’ia lejojë. Ndien keqardhje që profesioni që ajo e do aq shumë po humbet, shqetësim të cilin ia përcjellin edhe klientët e saj.
Si e vetmja tornitore në Elbasan konstaton se interesi për zanatet ka rënë , pasi të rinjtë nuk e duan punën. Ndaj e moshuara e ka një mesazh edhe për ta.
E ndërsa rrugët janë tejmbushur nga gra të cilat festojnë në vend që të protestonin për të drejtat e mohuara Natasha Fifo nxiton të mbyll në kohë porosinë e radhës dhe të marrë falenderimet e klientëve të saj.
Gazetarja e Fax News, Entela Duka: Juve keni dalë në pension dhe pavarësisht këtij fakti vazhdoni të punoni edhe pse është një profesion i vështirë për një grua.
Tornitorja: Po. Unë kam punuar që 20 vjeçe, pas kaq vitesh profesionin ia kam kaluar djemve. Nuk heq dorë, e kam patur pasion. Megjithatë do kujdes, do teknikë. Edhe pse e rrezikshme unë s’e kam të vështirë, e kam patur me dëshirë gjithmonë. Një tornitore bën punë të ndryshme, me makinat, tamburet, transport komplet. Më vjen keq, sepse zanati i tornitorit po zhduket, nuk e kanë qejf as meshkujt as femra.
Discussion about this post