Policia ka vënë në hetim në gjendje të lirë 8 persona pas protestës së zhvilluar nga opozita para Kryeministrisë. Policia thotë se protestuesit kanë ushtruar veprime të dhunshme dhe kanë hedhur molotovë në drejtim të Kryeministrisë.
Partia Demokratike mbajti mbrëmë protestën para Kryeministrisë, e cila zgjati rreth 2 orë e gjysmë bashkë me ndalesat te Bashkia e Tiranës dhe Kuvendi. Në drejtim të Kryeministrisë u hodhën molotovë sapo nisi fjalimi i ish-kryeministrit Sali Berisha, në hetim për aferën Partizani.
Dhjetëra molotovë iu drejtuan godinës së Kryeministrisë dhe Bashkisë, ndërsa në protestë u panë dhe persona të maskuar dhe me çanta të zeza të mbushura plot. Ndërkohë, Berisha iu drejtua militantëve përmes një videoje të regjistruar, ku foli për qeveri teknike. Të dy, bashkë me Metën sulmuan SPAK dhe drejtësinë e re.
Discussion about this post