Gjatë seancës së sotme plenare, ambasadori i SHteteve të Bashkuara të Amerikës Donald Lu, hoqi kufjet ndërkohë që fliste kryetari i ri i Kuvendit Gramoz Ruçi.
Këtë gjest të Lu-së, gazetarët e komentuan si një kundërshtim të SHBA-ve për zgjedhjen e Ruçit. Kujtojmë se SHBA i ka ndaluar vizën Ruçit, prej vitesh. Ndërsa gjatë seancës së votimit të Ruçit në Kuvend, ambasadori amerikan nuk mori pjesë.
Ditën e sotme Lu u takua me ambasadoren greke Eleni Surani në një kafe pranë Kuvendit, fill pas seancës plenare.
I pyetur nga gazetarët e BË për gjestin e tij me kufjet, Lu është përgjigjur me fjalët: “Nuk mund t’i përgjigjem kësaj pyetje”.
Ndërkohë sjellim ndërmend se në vitin 2011, Gramoz Ruçi ka pranuar se viza i është refuzuar për trafik narkotikësh.
“M’u refuzua për trafik narkotikesh, por pas bisedës me ambasadoren Ries shkova në SHBA”, është shprehur Ruçi i ftuar në emision “Debat” të gazetarit Alfred Peza në Vizion Plus.
Mirëpo sipas tij, akuzat janë sqaruar nga organet e specializuara shtetërore. Sipas Sali Berishës, SHBA-ja ende sot vazhdon ta refuzojë vizën për Ruçin. (D.D/Shuplaka)
Discussion about this post