Ministri i Brendshëm, Ervin Hoxha ka pritur sot në një takim zyrtar në ambientet e ministrisë, Të Ngarkuarën me Punë të SHBA në Tiranë, Nancy VanHorn dhe stafin që e shoqëronte.
Ministri Hoxha ka zbardhur detaje nga ky takim, të cilin ai e cilëson “një bisedë të frytshme rreth marrëdhënieve dypalëshe dhe bashkëpunimin që shoqërohet me rezultate në rritje”.
“E informova znj. VanHorn mbi angazhimin e strukturave të Ministrisë së Brendshme, posaçërisht Policisë dhe zyrës së Gjendjes Civile, në raport me detyrat dhe përgjegjësitë për procesin elektoral të 11 Majit, si dhe me disa të dhëna nga sondazhi i fundit që mat perceptimin e publikut për sigurinë dhe punën e Policisë,” thekson Hoxha në postimin në Facebook.
Njëherësh, ministri i Brendshëm i shprehu VanHorn falënderimet për kontributin e palës amerikane dhe partneritetin, sidomos për Policinë e Shtetit dhe agjencitë e tjera ligjzbatuese, në funksion të rritjes së sigurisë për qytetarët në të dy vendet.
