Britanikja “DorsetEcho” i ka kushtuar një artikull të veçantë Christopher Toms, një njeri i thjeshtë që ka për qëllim t’ua bëjë jetën më të bukur njerëzve në nevojë dhe konkretisht fëmijëve. Përmes “DorsetEcho”, ai bën thirrje për ndërgjegjësim, për të ndihmuar dhe ata që u duhet të mbijetojnë në kushte tmerrësisht të vështira.
Në vëmendjen e tij janë refugjatët e përqëndruar në Greqi, por më tepër fëmijët që jetojnë në kushte çnjerëzore në Shqipëri, duke vënë theksin tek komuniteti rom.
“Çfarë do të thotë Krishtlindje për ju? Në shtëpi së bashku me familjen, duke shijuar një vakt të mirë? Duke parë nipër dhe mbesat tuaja teksa hapin dhuratat? Ka dhe nga ata që e presin Krishtlindjen vetëm me një çati mbi kokë, ose duke mos e pasur as atë.”, nis artikulli i medias britanike.
Me këto mendime, Christopher Toms, përpiqet t’u vijë në ndihmë këtyre fëmijëve duke ua bërë jetën më të lehtë. Duke u siguruar ushqim, fruta, perime, rroba. Por pa harruar edhe gjëra të tilla si lapsa, stilolapsa, fletore, për të cilat Toms shprehet se u duhen fëmijëve për të zhvilluar veten e tyre.
“Kemi shkuar dhe ardhur në Shqipëri për shumë vite. Unë nuk mund ta besoja në fillim kur pashë se si jetonin këta fëmijë në këtë vend. Kam udhëtuar në Afrikë, kam parë njerëz që jetojnë në varfëri në Kenia, por ata duken si milionerë në krahasim me këta fëmijë. Ishte shokuese për mua. Ata nuk kanë asgjë, mezi kanë mbijetuar.” , shprehet Christopher Toms.
Referuar kësaj deklarate të Toms, britanikja “DorsetEcho” shkruan se një raport i UNICEF-it në 2014-ën vë në dukje se fëmijët që jetojnë në rrugët e Shqipërisë përbëjnë një situatë të dalë jashtë kontrollit që pas 1990-ës. Mbi 2 mijë fëmijë (referuar raportit të 2014-ës) flenë e punojnë rrugëve për shkak të humbjes së prindërve, për shkak të prindërve të alkoolizuar apo që i dhunojnë.
“Është një situatë e mjerueshme. Ata fëmijë nuk kanë ç’të presin, nuk kanë mundësi për ndryshim të mënyrës së jetesës. I mbetet vetëm të shpresojnë se situata politike në vend do të përmirësohet, e cila mendoj se po ndodh shumë ngadalë. U bëj thirrje njerëzve që të japin. Ne kemi kaq shumë dhe ata kanë shumë pak.”, shprehet Christopher Toms. (XH.A/SHUPLAKA)
[ngg_images source=”galleries” container_ids=”265″ exclusions=”158,159,160,163,164,165,166″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
