Tirana-Vllaznia, që ishte edhe takimi hapës i javës së 27 të kategorisë Superiore ka përfunduar në favor të miqve me rezultatin 1-2.
Shkodranët ishin të parët që kaluan në avantazh në minutën e 53 falë një penalltie të finalizuar saktë nga Olsi Gocaj.
Kryeqytetasit filluan të reagojnë, ndërsa në të 80 Mokhtar Cisse barazoi përkohësisht rezultatin. Pak minuta para fundit, Gurishta do shënonte golin e dytë për miqtë që do rezultonte edhe goli që vulosi rezultatin.
Ekipi shkodran me tri pikët e siguruara renditet në vendin e 5-të me 35 pikë duke shpresuar deri në fund për një vend që të dërgon në Kupat e Europës, ndërsa një pozicion më poshtë ndodhet Tirana, me 30 pikë.
2017-ta është kthyer në makth për bardheblutë në kampionat, pasi ende deri më sot nuk ka njohur fitore, pas 9 ndeshjesh.
Tifozët e Tiranës nuk e kanë kapërdirë dot humbjen në shtëpi të skuadrës së tyre me rezultatin 1-2 nga ana e Vllaznisë.
Pas ndeshjes, ata kanë sulmuar me gurë autobusin e tifozëve të Vllaznisë pranë “Vasil Shantos”.
Policia ka ndërhyrë dhe ka shoqëruar dy prej tifozëve të Tiranës. (M.D/ Shuplaka)
