Mediat greke kanë dhënë detaje në lidhje me krimin e rëndë që ndodhi në zonën e Koukakit, ku burri vrau gruan, dhe më pas njoftoi djalin e tyre për veprimin që kishte kryer.
Minutat e fundit të jetës së 46-vjeçares së vrarë nga bashkëshorti i saj kanë qenë të tmerrshme, pasi ajo u dhunua dhe torturua brutalisht nga 55-vjeçari para se të vritej me dy goditje thike.
55-vjeçari, që punonte si kuzhinier së fundmi, ka qenë një ish sportist i mundjes, ndërsa çifti prej disa kohësh nuk jetonte bashkë.
Sipas mediave greke, ai “u tërbua” kur pa 46-vjeçaren duke përgatitur një valixhe për një udhëtim që kishte planifikuar dhe filloi ta shante.
Viktima është kundërpërgjigjur dhe burri ka nisur ta dhunojë, e më pas ka marrë thikën e kuzhinës. Pasi e ka plagosur me thikë në shpinë, e ka goditur edhe në qafë dhe gjoks, duke e lënë të mbuluar nga gjaku në tokë.
Siç ka deklaruar në dëshminë e tij për hetuesit, ka qenë xhelozia ajo që e ka shtyrë 55-vjeçarin të kryejë krimin e rëndë. Ai u arrestua nga policia dhe tashmë do të përballet me akuzën e vrasjes.
Sipas informacioneve të protothema.gr, autori, para se të mbyllte derën e banesës ku kreu krimin, telefonoi djalin e tij duke i thënë “Jam grindur me nënën tënde. “Shko në shtëpi dhe shiko.”
