”Hyjmë në zgjedhje nëse…”, Lulzim Basha i shtron 3 kërkesa të rëndësishme Kryesisë

Kryetari i PD, Lulzim Basha, i propozoi kryesisë marrjen e 3 vendimeve te rëndësishme, që lidhen me ecurinë e aksionit të opozitës.

Basha thotë se PD-ja do të regjistrohet në zgjedhje, vetëm nëse krijohen kushtet që ato të mbahen të lira, dhe të pandikuara nga krimi. Po ashtu Gazmend Bardhi është mandatuar për të negociuar me partitë e tjera opozitare, për garantimin e zgjedhjeve, që sipas PD-së nuk do të lejohen të jenë fasadë.

1. Partia Demokratike e Shqipërisë të regjistrohet në zgjedhje vetëm pasi të jenë krijuar kushtet për zgjedhje të lira dhe të ndershme. Situata aktuale politike në Shqipërisë, nuk mundëson standardet demokratike për zgjedhje të lira dhe të ndershme. Është provuar se Qeveria e Edi Ramës ka bashkëpunuar me  krimin e organizuar për blerjen e votave.
2. Partia Demokratike e Shqipërisë të mos lejojë mbajtjen e zgjedhjeve fasadë, që shkatërrojnë demokracinë dhe vullnetin e qytetarëve shqiptarë.
3. Të mandatojë Kryetarin e Partisë dhe Sekretarin e Përgjithshëm për të negociuar me partitë politike të opozitës marrëveshjen për garantimin e zgjedhjeve të lira dhe të ndershme, mbrojtjen e interesit publik dhe formalizimin e aksionin opozitar për arritjen e këtyre qëllimeve.

Kujtojmë se Basha ka mbledhur sot kryesinë dhe ish-deputetët, ku do të diskutohet dhe lidhur me mbajtjen e protestës së radhës nga ana e opozitës.

Po ashtu në këtë takim pritet që të diskutohet lidhur me zgjedhjet lokale, për të cilat Basha nuk është shprehur qartësisht nëse PD-ja do të marrë pjesë. Kryedemokrati ka theksuar se zgjedhje me Edi Ramën nuk do të ketë.

(E.K/FAXWEB.AL)