Elseid Hysaj është një nga lojtarët e Kombëtares Shqiptare më në formë të këtyre kohëve të fundit. Jo pak herë Hysaj ka qenë nën orbitën e disa klubeve por ai është shprehur se tifozeria e Napolit është ndër më te zjarrtat në Itali dhe për këtë ai e ka të vështirë të largohet.
Por nëse ka një tifozeri e cila mund të thuhet pa frikë se është më e veçantë se e Napolit dhe që mund të bëjë Hysajn të ndërrojë mendje, është ajo e Liverpulit, klub i cili mendohej se po ndjek me shumë interes futbollistin shqiptar
Ashtu si shumë klube të tjera angleze, edhe Liverpuli po monitoron mbrojtësin e përfaqësueses kuqezi, me objektivin për ta afruar në verë. Mediat italiane kanë zbuluar se Jurgen Klop kërkon të përforcojë krahët e prapavijës dhe dy emrat që ka piketuar janë Matia De Shiljo i Milanit dhe pikërisht Elseid Hysaj.
Më shumë se aspekti ekonomik i marrëveshjes, për Hysajn sigurisht që do të kishte më shumë vlerë transferimi në një prej ekipeve legjendare të futbollit botëror, me një tifozeri unike e cila ka bërë për vetë disa nga figurat me të mëdha të këtij sporti.
Tani mbetet të shihet se si do të rrjedhin ngjarjet në verë dhe nëse Hysaj do të transferohet në stadiumin legjendar “Anfilld” për të dëgjuar me rregullsi korin legjendar “You’ll never ëalk alone” që bën magjik këtë impiant.
