Elseid Hysaj gjatë këtij sezoni nuk ka shfaqur shkëlqimin e vitit të kaluar te Napoli. Megjithatë, pas mbështetjes së marrë nga trajnerit Mauricio Sarri (“Është i ri, ka luajtur në Europian dhe Champions brenda një viti”), për mbrojtësin e Kombëtares vijnë fjalë të ngrohta edhe nga agjenti i tij, Mario Xhufredi.
Në një intervistë për “Radio Kiss Kiss Napoli”, menaxheri italian arsyetoi formën e 23-vjeçarit. “Sarri i tha me zgjuarsi ato fjalë. Hysaj ka luajtur më shumë se 100 ndeshje në dy vitet e fundit, ndaj një rënie e lehtë është e kuptueshme. Janë dy faktorë të rëndësishëm: stresi i diskutimeve për rinovimin e kontratës dhe djali i lindur pak muaj më parë, që i ka hequr disa orë çlodhjeje”, deklaroi Xhufredi.
Ai u ndal edhe te ndeshja e së premtes mes Italisë dhe Shqipërisë, që pritet të vërë përballë Hysajn me Insinjen, shok skuadre te Napoli. “Kanë një marrëdhënie të shkëlqyer edhe jashtë fushe. Do të jetë një sfidë shumë argëtuese dhe nga pikëpamja futbollistike”, tha agjenti i mbrojtësit shkodran.
