Tre ditë më parë shkrimtari i madh Dritëro Agolli u dërgua me urgjencë në spital për shkak të problemeve me rrugët e frymëmarrjes. Pak orë më pas, vajza e tij Elona e ka përshëndetur të atin përmes publikimit të një poezie në Facebook.
“Këta që vdekjen ma ndjellin janë poetët,
Poetët me njëri-tjetrin nuk duhen kurrë!
Kur gripi më zë i ngrenë veshët
Dhë bëjnë sikur u vjen keq: “Vërtet i sëmurë”?”, thuhet në vargjet e fundit të poezisë.
Mos vallë Elona me këtë përpiqet të thotë se disa njerëz po i urojnë vdekjen të atit në këtë moment?! Sepse ajo mund të kishte publikuar edhe një poezi tjetër për shkrimtarin dhe poetin e madh. Sido që të jetë, ne i urojmë shërim të shpejtë Agollit. (D.D/Shuplaka)
Poezia e Dritëroit:
Dalëngadalë
Mbaruan të gjitha gjërat që kishte shtëpia:
Në oborr u tha në fillim një dardhë,
U shterr dhe pusi i madh tek avllia
Ku kishte koliben qeni i bardhë.
Dhe vdiqën njëri pas tjetrit
Im atë, vëllezërit e tij, së fundi dhe nëna;
Tani kam mbetur veç unë këtu nga të vjetrit
Tek bulevardi zvarris këpucët e ngrëna.
Kështu, më i vjetri nga fisi jam unë
Gëzohem që rroj me miqtë e mi të hershëm të rrallë,
Por ka edhe të tjerë, madje edhe shumë,
Që thonë: “Ende ky gjallë”?
Këta që vdekjen ma ndjellin janë poetët,
Poetët me njëri-tjetrin nuk duhen kurrë!
Kur gripi më zë i ngrenë veshët
Dhë bëjnë sikur u vjen keq: “Vërtet i sëmurë”?
Discussion about this post