Policia e Elbasanit ka arrestuar 7 persona lidhur me protestën që u bë dje në hyrje të Librazhdit, kundër vizitës së Edi Ramës. Mes personave të arrestuar është dhe ish-deputeti Aurel Bylykbashi dhe kreu i PD-së në Librazhd Bujar Vreto.
Burime nga PD bëjnë me dije se mes personave të shoqëruar janë edhe kryetari i PD në Prrenjas Arjan Karriqi, dhe sekretari Leonard Ozuni.
Qytetarët e revoltuar hodhën sende të forta dhe mjete piroteknike në drejtim të eskortës së Ramës, ndërsa makina ku udhëtonte kryeministri u largua nga një rrugë dytësore.
Gjatë momenteve shpëtuan mrekullisht dhe dy punonjës të gardës, të cilët u përplasën nga makina e Ramës, në përpjekje për të mbajtur larg qytetarët.
Njoftimi i policisë:
23 të proceduar ndër ta 7 të arrestuar për protestën e paligjshme të organizuar mbaditen e datës 13 qershorit në hyrje të qytetit të Librazhdit
Policia e Librazhdit bazuar në pamjet filmike, dhe raportet e shërbimit, ka bërë arrestimin në flagrancë të 7 personave për veprat penale të “Organizimit, pjesëmarrjes në grumbullime, manifestime të paligjshme”, dhe “Pengimi i qarkullimit të mjeteve të transportit’’ “Pengim i subjekteve zgjedhore”, konkretisht:
– B.V., 48 vjeç, (Kryetari i Degës së PD-së Librazhd);
– A.B., 53 vjeç, nga, Elbasani (ish deputet i PD);
– A.K., 43 vjeç, nga Prrenjasi;
– E.G., 32 vjeç, nga Librazhdi (sekretari i PD-së, dega Librazhd);
– D.B., 47 vjeç, nga Shtërmeni, Cërrik;
– L.O., 31 vjeç, nga Piskashi;
– B.K., 54 vjeç, nga Librazhdi.
Po kështu ka filluar proçedimi penal në gjëndje të lirë, për të njëjtat vepra penale edhe për 16 shtetas të tjerë.
Arrestimi dhe proçedimi i këtyre personave u bë pasi në datën 13.06.2019, rreth orës 18:00 këta shtetas janë grumbulluar në rrugën nacionale në hyrje të qytetit të Librazhdit tek kryqëzimi i Përrenjasit dhe në vijim kanë tentuar që të bllokojnë rrugën nacionale Elbasan – Librazhd, në hyrje të qytetit të Librazhdit, duke penguar eskortën e Kryeministrit dhe kanë goditur eskortën me sende të forta e lëndë plasëse piroteknike.
Materialet proçedurale u referuan në Prokurorinë pranë Gjykatës së Shkallës së Parë Elbasan.
