Në mbledhjen e sotme të qeverisë, kryeministri edi Rama ka vendosur që të dëgjojë rivalin e tij në opozitë, Lulzim Bashën duke e shtuar rrethin e vendeve që ndodhen nën gjendjen e jashtëzakonshme. Pas Durrësit dhe Thumanës, gjendja e jashtëzakonshme do të shpallet dhe në Laç.
“Ne e kemi diskutuar me shqetësim të madh, ka dëme edhe në Laç, kanë dalë nga godinat dhe janë nëpër çadra, do të trajtoheshin njësoj të përfshihen në vendimin e perimetrit të emergjencës. Duke konsideruar edhe opinionin e kryetarit të opozitës them që na përputhen shqetësimet edhe idetë. Përfshijmë edhe zonën e prekur të Laçit në të njëjtin program që askush të mos ndihet i vendosur në një kategori të dytë të vëmendjes”, tha Rama.
Po ashtu Rama i shtriu dorën opozitës dhe për të qenë pjesë e Komitetit Kombëtar të Ndërtimit, pasi do të ishte e nevojshme një asistencë shtesë qoftë në aspektin financiar qoftë në atë teknik.
“Do të ishim të lumtur të ishte edhe opozita qoftë sa i përket aspektit financiar, qofte dhe teknik. nuk kemi çfarë ndajmë në këtë aspekt përveçse nevojën e përbashkët për të bërë më të mirën për njerëzit.
Nuk është komision i reformës zgjedhore, as komision dekriminalizmi, as i ndarjes së engjëjve dhe djajve. Këto janë komisione për ditët me diell në këtë ditë pa diell në këtë punë që do të vazhdojë e pa cënuar nga jeta e përditshme politike që nuk diskutohet së shpejti do të rifillojë se shenjat e para janë dhënë, është mirë të jemi bashkë, është mirë të punojmë bashkë”, tha Rama.
Lidhur me dëmet në pallate dhe në banesa Rama tha:
Në Durrës janë 701 banesa të dëmtuara, 12 të shkatërruara totalisht, 176 pallate të dëmtuara.
Në Tiranë, janë 15 të banesa shkatërruara, 239 banesa të dëmtuara, 8 pallate jashtë funksionit, 61 pallate të dëmtuar rëndë.
Ky bilanc kërkon të plotësohet në mënyrë që askush të mos mbetet jashtë bilancit.
Në Tiranë janë 3480 persona pa shtëpi. 1 mijë janë të akomoduar në 5 qendra private, të tjerët në çadra dhe tek të afërmit.
Në Elbasan janë akomoduar 209 persona, ndërsa në Durrës 625.
(E.K/Faxweb.al)
