Ratko Mlladiç, ish-komandanti ushtarak i serbëve të Bosnjës dhe i dënuar për gjenocid dhe krime kundër njerëzimit, ka paraqitur kërkesë për lirimin e tij nga burgu për arsye shëndetësore. Ai pretendon se vuan nga një sëmundje e pashërueshme dhe se, sipas avokatit të tij, i kanë mbetur vetëm pak muaj jetë.
Mlladiç, i cili është mbi 80 vjeç, po vuan një dënim të përjetshëm në Hagë që prej vitit 2021, pasi u shpall përfundimisht fajtor për rolin e tij në masakrën e Srebrenicës, ku forcat serbo-boshnjake vranë mbi 8.000 burra dhe djem myslimanë në korrik të vitit 1995. Ai ishte në arrati për 16 vjet dhe u arrestua në Serbi në vitin 2011.
Avokati: “Është në gjendje të rëndë, duhet të lirohet për arsye humanitare”
Në kërkesën drejtuar Gjykatës, avokati i Mlladiçit thekson se ai ndodhet në gjendje të rëndë shëndetësore dhe vuan nga një sëmundje e pashërueshme. “Pavarësisht se shërbimi mjekësor i burgut të Kombeve të Bashkuara nuk ka bërë një vlerësim përfundimtar me shkrim, është e qartë se z. Mlladiç i afrohet fundit të jetës”, thuhet në kërkesë, ku kërkohet lirimi i tij “për arsye humanitare”.
Kjo nuk është hera e parë që ai kërkon lirimin. Në vitin 2017, kishte bërë një kërkesë të ngjashme, e cila u refuzua.
Figura e debatueshme në Serbi;
Djali i tij, Darko Mlladiç, ka folur shpesh në media për gjendjen e rënduar të të atit, ndërkohë që në Serbi Mlladiç vazhdon të konsiderohet “hero lufte” nga një pjesë e shoqërisë.
Sipas organizatës “Nisma e të Rinjve për të Drejtat e Njeriut” (YIHR), në mars të vitit 2023 u dokumentuan mbi 250 raste të grafiteve dhe portreteve të Mlladiçit nëpër muret e Beogradit, disa prej tyre në afërsi të “Sheshit të Demokracisë”. Në disa raste, këto shoqërohen me mbishkrime që mohojnë gjenocidin në Srebrenicë.
