Thomas Tuchel beson se Neymar do të bëhet edhe më i mirë, pas golit të radhës vendimtar e të fitores për PSG (në transfertën me Lyon, 0-1). Trajneri gjerman këmbëngul se sulmuesi ishte 100 për qind i shkrirë me skuadrën:
“Ai ende mund të bëjë më mirë. Kjo ishte vetëm ndeshja e tij e dytë, ose e treta në katër muaj. Neymar do të japë më shumë, sepse do të rritet edhe fizikisht. Në çfarëdo situate, ai është gjithmonë vendimtar, mendon të luajë përpara, të sulmojë. Ne kemi nevojë për lojtarë si ai në ndeshje të vështira, për të bërë ndryshimin.
Neymar ka një kontratë, kështu që është 100 për qind i përqendruar te PSG. Unë madje mund të konfirmoj se është i shkrirë plotësisht me skuadrën në fushë dhe me grupin në përditshmëri. Ai qesh shumë me shokët e tij të skuadrës. Kjo është shumë pozitive për atë vetë dhe PSG. Është me ne për të shënuar, për të bërë gjëra vendimtare, kështu që jam shumë i lumtur me të”.
