Gjykata e Krimeve të Rënda ka dhënë masën e arrestit me burg për Ragip Hajdinin, i quajtur ndryshe dhe me pseudonimin ‘’Daja”, pasi dyshohet si bashkëpunëtor në grabitjen e Rinasit.
Para grupit hetimor, Hajdini nuk ka dhënë sqarime lidhur me rolin e tij në grabitjen e disa miliona eurove të datës 9 prill në aeroportin e Rinasit.
Policia e Shtetit vuri në pranga Hajdinin pas dëshmisë së Alkond Bengasit, i cili deklaroi para hetuesve se ishte një shqiptar i Kosovës që shoqërohej me Admir Muratajn.
Lidhur me këtë rast policia shqiptare ka bashkëpunuar dhe me autoritetet kosovare duke shkëmbyer informacione, nga ku ka rezultuar se Hajdini është me precedent të mëparshëm kriminal.
50-vjeçari nga Peja është i dyshuar për grabitjen e 25 kilogramëve ar nga dhoma e dëshmive në policinë e Pejës, ngjarje kjo e ndodhur në vitin 2012, por dhe për grabitjen e një argjendarie në Dibër të Madhe në korrik të 2014-ës.
Për grabitjen e miliona eurove në Rinas deri më tani janë arrestuar Elton Pikli, Oltjon Veseli, Alkond Bengasi, Renaldo Sula dhe Saimir Çela.
(E.K/FAXWEB.AL)
