Bashkia e Tiranës iu ka shprehur sot mirënjohjen të gjithë vullnetarëve dhe strukturave shtetërore, pasi javën e kaluar u bënë bashkë për të përballuar situatën e emergjencës që preku Tiranën për shkak të ftohtit polar.
Në këtë takim morën pjesë përfaqësues të emergjencave civile, shërbimit zjarrfikës, shërbimeve sociale, policisë bashkiake dhe individë të tjerë që iu bashkuan nismës së Bashkisë së Tiranës.
Kryebashkiaku Erion Veliaj vlerëson rolin që kanë luajtur të gjithë në një situatë të pazakontë për një qytet si Tirana, duke bërë që të kalojë pa asnjë incident.
“Ajo që kam më përzemër janë historitë fantastike të këtyre 10 ditëve të fundit në qytetin tonë sepse ka qenë një periudhë që mua më ka frymëzuar shumë, më ka bërë të kuptoj sa i bekuar jam që punoj me të gjithë ju, e sa mirënjohës jam për punën e të gjithëve! Sot jemi në një fazë ku të gjithë e pranojmë se sa më shumë të bëjmë, aq më shumë zbulojmë që duhet bërë, se sa më shumë u morëm me kopshtet e çerdhet, aq më shumë zbuluam sa dramë ishin shkollat. Por, nuk ka njeri në këtë qytet që kur shikon përpjekjen titanike që secili bëri në këtë fazë të vështirësive, thotë se ka një përpjekje të sinqertë për t’i çuar gjërat përpara”, u shpreh Veliaj.
Kryebashkiaku ka shprehur një falenderim të veçantë për punën që bëri Policia Bashkiake, pasi u angazhuan maksimalisht për shpëtimin e njerëzve.
“Unë e di fare mirë çfarë do të thotë të jesh në Policinë Bashkiake.
Së pari, sepse nga të gjitha skuadrat me uniformë, është ajo e paguara më pak; së dyti, ka trashëguar ndoshta imazhin më të rëndë nga e kaluara. Po unë di të them këtë që kush e pa sjelljen e Policisë Bashkiake këto 10 ditë, sot ka një mendim totalisht ndryshe për dinjitetin që i është kthyer uniformës së Bashkisë së Tiranës nga policia jonë e re bashkiake”, shtoi ai.
Veliaj falenderon gjithashtu edhe punonjësit e shërbimit social, të cilët iu krijuan kushte të gjithë të pastrehëve që shumica ishin në gjendje rruge, fëmijë dhe pensionistë. Sipas tij, Tirana e shfaq veten gjithmonë solidare dhe është e gatshmë për çdo gjë.
Për këtë, kreu i Bashkisë falenderoi të gjitha bizneset dhe familjet tiranase që dhanë kontrubutin e tyre me ndihmat sociale, duke ofruar ushqime dhe veshje.
“Nuk keni ushqyer vetëm disa njerëz keni ushqyer një kulturë të re, edhe kulturën e të shërbyerit, pavarësisht nëse je i këtij qyteti, apo jo, pavarësisht se je sipërmarrës apo i pastrehë, dhe unë besoj se shembulli juaj na ka frymëzuar të gjithëve”, thekson Veliaj.
Gjatë fjalës së tij, Veliaj lajmëroi për një nisëm të re të ndërmarrë nga Bashkia për të kthyer një nga qëndrat sociale në një hapësirë ku personat te rrugës të mund të strehohen gjatë natës. (K.P/Shuplaka)
Discussion about this post