Një ngjarje e rëndë u shënua rreth një javë më parë në qytetin e Durrësit, ku një shtetas 45-vjeçar i hodhi ujë të nxehtë të bijës 14-vjeçare.
Akti i rëndë u krye brenda banesës, pasi ishte zënë me bashkëshorten e tij. Si pasojë e ujit të nxehtë, adoleshentja është djegur në këmbë dhe është transportuar në QSUT nën kujdesin e mjekëve.
14-vjeçarja u përfshi me qëllim shuarjen e konfliktit.
Burime të Policisë së Durrësit bëjnë të ditur arrestimin së fundmi të shtetasit të shpallur në kërkim, Kujtim Xhura 45 vjeç, banues në Durrës.
Detaje të Policisë së Durrësit:
Specialistët për Krimet në Komisariatin e Policisë Durrës bënë të mundur ndalimin e shtetasit në kërkim:
- Kujtim Xhura 45 vjeç, banues në Durrës.
Prokuroria pranë Gjykatës së Rrethit Gjyqësor Durrës ka urdhëruar ndalimin e tij për veprën penale “Dhunë në familje” parashikuar në nenin 130/a/4 të Kodit Penal.
Xhura, më datë 01.03.2017, rreth orës 18:00, në banesë, në gjendje të dehur, pas një konflikti për motive të dobëta me bashkëshorten e tij, dyshohet se i ka hedhur ujë të nxehtë vajzës së tij, shtetases A.Xh. 14 vjeçe, e cila është përfshirë për të shuar konfliktin midis prindërve.
Materialet I kaluan Prokurorisë së Rrethit Gjyqësor Durrës për veprime të mëtejshme.
(XH.A/SHUPLAKA)
